Ladies Corner

Aankhon ki sujan ka desi ilaj – Puffy Eyes Treatment in Urdu

Aksar logon ko aankhon ke gird sujan ka masla ho jata hai. Aur woh is kafiyat se pareshan rehtay hain kyunkay aankhon ki sujan unhein apni umar se kahin ziyada bara dukhati hai.

Sooji hui aankhon ki wajah se aap thakey hue aur ziyada umar ke bhi lagtay hain. Aankhon ki sujan ki sab se aam wajah thakan aur be aarami hoti hai. Is ke ilawa yeh zehni dabao aur pani jama hojane ki wajah se bhi ho jati hai.

Aankhon ki sujan ka desi ilaj – Puffy Eyes Treatment in Urdu

Is tehreer mein hum bat karen gay ke aankhon ke upar ki aur neeche ki sujan kaise dur kare, In gharelo totkon ke zariye aap aankhon ke gird sujan se bah aasani nijaat pa satke hain.

Tea Bags ka istemaal

Aankhon ki sujan kam karne ke liye Tea Bags ka istemaal arsa daraaz se kya ja raha hai. Chai (Tea) chahay sabz ho ya safaid is mein mojood caffeine aankhon ke neechay pani bhar jane ki wajah se honay wali sujan ko kam karne mein madad deti hai.

Ajzaa

  • Tea Bags 2 adad
  • Garam pani

Tarkeeb: Garam pani mein dono Tea Bags bigho kar 5 Minute ke liye rakh den. Neem garam Tea Bags ko aankhon ke papooton par rakh len.

Oopar se naram kapra dhaanp len aur aadha ghantay ke liye chor den. Din mein do se teen martaba yeh amal dohrayen, jald hi aankhon ki sujan kam honay lagey gi.

Green Tea Bags

Green Tea mein mojood antioxidant aankhon ke gird jald ko taazgi bakhshte hain aur ankhon ki surkhi aur soojan ko khatam karte hain.

Tarkeeb: Tea Bags ko thanday pani mein daal kar fridge mein rakh den.
Thanday Tea Bags aankhon par 10 se 15 minute ke liye rakhen.

Nariyal ka tail

Nariyal ke tail (Coconut Oil) mein anti inflammatory khususiyaat mojood hain. Jald ki soozish khatam karne ke sath yeh jald ko tawanai bhi bakhshta hai. Nariyal ke tail ka baqaida istemaal puffy eyes, aankhon ki sojan ko kam karne mein madad deta hai.

Tarkeeb: Saaf unglio par nariyal ka tail laga kar aankhon ke gird golai mein chand minute tak massage karen. Phir saari raat ke liye laga rehne den.

Rozana raat ko sonay se pehlay lagayen.

Kaafi ka choora

Kaafi mein mojood caffeine ki anti inflammatory khususiyaat soozish ko khatam kar kay aankhon ki sujan ko kam karti hain.

Kaali mirch powder aankhon ke gird douran khoon ko barha kar cells ko tawanayi bakhshta hai. Nariyal ka tail jald ko nami faraham kar kay chamakdar banata hai.

Ajzaa

  • Choora kaafi aadha chai ka chamach
  • Aik chuttki pissi hui kaali mirch
  • Nariyal ka tail aik chai ka chamach
  • Roi ya wipes

Tarkeeb: Kaafi, kaali mirch aur nariyal ke tail ko achi tarah mila kar ahtiyat ke sath aankhon ke neechay lagayen ke aankhon ke andar nah ja paye.

10 se 12 minute ke liye laga rehne den. Roi ko geela kar kay ya wipes se saaf karlen. Fori arram haasil karne ke liye haftay mein kayi martaba istemaal kar saktay hain.

Thanda chamach

Steal ka thanda chamcha khoon ki nalion ko arram pohanchata hai aur ankhon ke neechay ki sujan ko kam kar ke puffy eyes se nijat dilata.

Tarkeeb: 4 se 5 Chamchon ko adhay ghantay ke liye fridge mein rakh dain.

Chamchay ki golai wala hissa 15 se 20 minute ke liye aankhon ke neechay rakhen. Behtareen nataij ke liye din mein do martaba yeh amal karen.

Khanay ka sodda

Khanay ka sodda douran khoon barha kar sujan ko kam karta hai. Yeh qudrati exfoliator hai jo aankhon ke neechay qudrati chamak peda kere ga.

Ajzaa

  • Aik chai ka chamach khanay ka sodda
  • Aik cup garam pani
  • Cotton Pads

Tarkeeb: Garam pani mein sodda achi tarah mix karlen.
Is pani mein cotton pads bigho kar nichor len aur aankhon par 10 se 15 minute ke liye rakh len.

Pads hata kar thanday pani se mun dho len. Halka sa khushk kar kay moisturizer laga len. Din mein aik ya do martaba lagayen.

Kheera

Bhaari papooton se nijaat haasil karne ke liye thanda kheera behtareen hai. Kheera soozish ko khatam karta hai jab kay is ki thandak sujan kam kere gi.

Ye bhi parhen: Chehre ki khubsorti ke liye Kheeray ka face mask banana

Yeh totka na sirf aankhon ki sujan ko kam kere ga balkay gehray halqon aur aankhon ke gird jhuriyon ko bhi khatam karne mein madad day ga.

Tarkeeb: Kheeray ke slice kaat kar 15 se 20 minute ke liye refrigerator mein rakh den. Fridge se nikaal kar thanday slice aankhon ke papooton par rakhen.

10 se 15 minute ke liye rakha rehne den, phir hata den.
Din mein kayi martaba karen.

Anday ki safedi ka mask

Anday ki safedi ko bhi aankhon sujan kam karne ke liye istemaal kya ja sakta hai. Anday ki safedi jald ko tight karne ki khususiyaat rakhti hai. Is ke istemaal se papooton ki sujan aur aankhon ke gird mojood jhuriyan khatam hoti hain.

Ajzaa

  • Aik anday ki safedi
  • Naram brush ya kapra

Tarkeeb: Anday ki safedi ko achi tarah phaintain ke jhaag ban jayen. Naram brush ya kapray ki madad se yeh safedi aankhon ke neechay lagayen aur kuch der ke liye sokhne ke liye chor den.

15 minute baad neem garam pani se dho len. Rozana din mein aik martaba lagayen, chand hi dinon mein wazeh farq nazar aeye ga.

Aloe Vera

Aloe Vera mein zurori vitamins aur antioxidant mojood hain. Yeh na sirf bhaari papooton ko sahih kere ga balkay jald par barhti umar ke asraat ko bhi khatam karne mein madad day ga.

Tarkeeb: Aloe Vera ka taaza jail leker aankhon ke bhaari papooton par ahthyat ke sath lagayen.
8 se 10 minute ke liye laga kar chhorhdin aur sokhne den.
Thanday pani se dho len. Din mein do martaba lagayen.

Petroleum jelly

Petroleum jelly kati phati jald ko sahih kar kay nami faraham karti hai. Sath hi yeh jald ki soozish aur sujan ko bhi kam karti hai.

Tarkeeb: Raat ko sonay se pehlay petroleum jelly se aankhon ke neechay aur ird gird chand minute ke liye massage karen.
Papooton ki sujan khatam hojane tak rozana lagayen.

Aalo

Aalo na sirf aankhon ke liye achay hain balkay joron ki sujan aur soozish ko bhi khatam karte hain. Aalo aankhon ke neechay honay wali soozish ko khatam karne mein madad dete hain.

Tarkeeb: Aik darmiyaana aalo chheel kar kaddu kash kar len.
Aalo ke Is choray ko kapray mein bandh kar aankhon par rakh len.
10 se 15 minute tak rakh kar hata len. Din mein do se teen martaba lagayen.

Note: Ye tehreer mehez maloomat aama ke liye shaya ki ja rahi hai. yaad rakhen har totka har insan ke liye nahi hota. iss liye apne tain koi nuskha mat azmayen, balkay apne mualij (Doctor, Tabeeb) se mahswara kar ke is ki hadaayat ke mutabiq amal karen, shukriya