Asli aur khalis Shehad Ki Pehchan Ke 11 Tarike
General Information

Asli aur Khalis Shehad Ki Pehchan – Pure Honey Test in Urdu

Shehad, Doodh aur Ghee 3 aisi cheeze hain ke jin ko jab tak apni aankhon ke samnay haasil na kya jaye in ke khalis honay par aitbaar nahi kiya ja sakta, kyunkay hamaray malik mein jitna Shehad makhion se haasil hota hai. Is se kahin ziyada markets mein farokhat hota hai aur ye sab ka sab masnoi (artificial) aur jaali (fake) hota hai.

Asli aur Khalis Shehad (Pure Honey) haasil karne kasb se ziyada qabil aetmaad tarika ye hai ke Shahad ki makhion ka chatta talaash kya jaye, aur thori se himmat ka muzahira karte hue khalis Shehad haasil kar liya jaye.

Lekin ye kaam itna khatarnaak hai ke aam shakhs is ka tasawwar hi nahi kar sakta, kyunkay Shahad ki makhiyan itni zahrili hoti hain ke un ke katnay se mout (death) bhi waqay ho sakti hai.

How to check the purity of honey at home

Roman Urdu mein aaj hum aap ko bitayen ge ke kaisay aap asli (khalis) aur jaali (naqli) Shehad ki pehchan kar satke hain. Kaisay aap ko pata chalay ga ke pure honey kon sa hai. how to check pure honey in Urdu and How to differentiate 100% pure honey and fake honey?

1 Shehad ko Pani mein hal karen

Asli aur khalis Shehad ki pehchan ka sab se aasaan aur azmooda tarika ye hai ke Shahad ko pani mein hal kar ke dekha jaye. Aik glass mein pani le kar Shehad se bhara chamach is mein daal den, agar Shahad khalis hua to ye pani mein hal nahi hoga, agar khalis na hua to hal ho jaye ga, kyun ke market mein dastyab aksar Shehad gur se banaye ja rahay hain. Aur gur pani mein hal ho jata hai.

Khalis Shehad pani mein aasani se hal nahi hota. Is liye khalis Shehad ki pehchan ke liye aik pyaale mein pani dalain aur oopar se Shahad qatray qatray ki shakal mein pani ke pyalaa mein tapkaya jaye.

Agar to ye qatray saabit o salim penday tak chalay jatay hain. To is ka matlab hai ke Shehad asli hai aur is ke bar-aks sharbat ya sheerah ka qatra penday tak jane se pehlay hi toot jata hai to is ka matlab hai ke Shehad khalis nahi hai.

2 Shehad ko Aag laga kar dekhen

Shehad ke asli aur khalis (real and pure) honay ki pehchan karne ke liye aap ko aik adad lighter aur mom batii darkaar ho gi. Is tarika ke zariye Shahad ki jaanch ke liye mom batii mein mojood cotton ki batii ko Shehad mein bigho kar aik baar jhatak den aur baad azan lighter se usay aag laganay ki koshish karen.

Agar Shehad asli huwa to cotton ki batii, petrol ya sarson ke tail ki terha jal jaye gi. Lekin agar Shahad naqli ho ato sheerah ki terha dhuwan chor kar aur bo peda kar ke koyla chor kar jalay gi.

3 Shehad ka Gaarha Pan

khalis Shehad ki pehchan ka sab se aasaan tarika hai ke Shehad ka gaarha pan dekha jaye kyunkay asli aur khalis Shahad umooman gaarha hota hai. Is ko dekhnay ke liye Shehad ko aik chamchay mein bharain aur usay kisi bartan mein khaali karne ki kosh karen.

Agar ye ahistagi se chamach se neechay giray to qawi imkaan hai ke ye asli hai. Jaali Shahad maya ki soorat mein taizi se chamchay se behnay lagey ga.

Shehad ka gaarha pan check karne ka dosra tarika ye hai ke Shehad ke dabbay mein keel ki madad se sorakh kar kay Shehad ko aik tashtari mein ulta diya jaye to asal Shehad sorakh se aahista aahista aur saanp jaisi kundli ki shakal mein jama hoga, magar naqli Shahad mein ye baat na hogi.

4 Shehad ko Double Roti par lagayen

Shehad ko double roti par lagayen. Agar double roti sakht rahay to is ka matlab hai ke Shehad khalis hai. Agar double roti naram ho kar Shehad mein bhigne lagey to is ka matlab hai ke ye Shahad cheeni se banaya gaya hai.

5 Shehad ko Fridge mein rakhen

Asli aur khalis Shehad fridge mein rakhnay ki soorat mein jim jata hai aur mazeed gaarha hojata hai taa waqtia kay usay fridge se bahar rakh kar mamool ke darja hararat par na laya jaye. Naqli Shahad fridge mein rehne ke bawajoo jon ka ton maya haalat mein barqarar rehta hai.

6 Kaghaz ka istemaal

Shehad ke chand qatray jazb karne walay kaghaz par par tapka den, agar ye kaghaz qatroun ko jazb kar gaya to is ka matlab hai ke ye Shehad khalis nahi hai. Kyunkay khalis Shahad kaghaz ki satah par mojood rehta hai.

Agar aap ke paas jazb karne wala kaghaz nahi hai to is ke liye aap safaid kapra bhi istemaal kar satke, is kapray par Shehad ke chand qatray gira kar thori der baad kapray ko dho len agar to kapray par dhabbay ka nishaan reh jata hai to is ka matlab hai ke Shehad khalis nahi hai.

Shehad ki pehchan ka aik tarika ye bhi hai ke tirchay kaghaz ya kapray par agar Shehad ka qatra giraya jaye aur Shahad ka moti kapray par lagey baghair agay phisal jaye to Shehad asli hai.

7 Shehad ko dekh kar aur sungh kar check karna

Qudrati Shehad naqli Shehad ki bah nisbat ziyada patla aur dhundlaa hota hai aur polan ke zarraat Shahad ki satah par nazar atay hain. Har Shehad ki apni allag khushbu hoti hai jo phoolon ki bhini bhini mehak se mehak raha hota hai, jab ke sheeray aur glucose se tiyar shoda Shehad soonghnay par saaf pata chal jata hai ke ye sheerah hai.

8 Shehad ka Patla ho jana

Qudrati Shehad mein aik khaas terha ka system hota hai. Is pressure ke tehat Shehad hua mein mojood nami ko jazb kar laita hai. Aik khulay mun ki bottle mein taqreeban pachees gram (2 Chamach) Shahad rakh kar chand dinon ke liye chor den, agar Shehad asli hua to patla ho jaye ga aur naqli ho to satah par khushk ho jaye ga aur aik bareek jhilli satah par aajay gi.

9 Shehad ko Chakh kar dekhna

Har ilaqa ka Shehad apna aik makhsoos zayega rakhta hai, kabhi bhi aik ilaqay ka Shehad dosray ilaqay ke Shehad jaisa nahi hoga chahay kisi aik makhsoos phool ke baagaat se haasil shuda hi kyun na ho.

Maslan ajwain, maaltay aur sarson ka Shahad yaad rakhen. Shehad ka zayega mousmi darakhton, phalon, phoolon ilaqon ke hisaab se tabdeel hota rehta hai.

Agar kisi company ka Shehad hamesha aik jaisi rangat, khushbu aur zayega wala ho to samajh len ke ye qudrati nahi hai balkay formulay ke tehat shuda hai. Yaad rakhen ke Shahad ki makhi ko jis mausam ke phoolon ka ras yani ghiza miley gi waisay hi is ka zayega ho ga.

10 Namak ke zariye

Asli Shehad ki pehchan ye hoti hai ke is mein namak ki dali hal nahi hoti, namak ki dali le kar Shehad mein ghumayen. Aap jitni der chahay namak hal kar len Shehad mein namak ka zayega nahi aaye ga. agar nimak ki dali ghumanay ke baad Shehad mein namak ka zayega mehsoos ho to is ka matlab hai ke Shehad naqli hai.

11 Bujhe hue Choonay ka istemaal

Un-bujhe choonay ki aik choti si dali le kar usay thoray se Shehad mein duubo den. Agar choona waisay hi para rahay to is ka matlab hai ke shahad asli aur khalis hai. Lekin agar is mein se chirr chirr ki aawaz aaye ya dhuwan niklay to aisa Shehad khalis nahi hai.

Khalis Shehad ki pehchan ke deegar tarike:

Matazkarah baala tareeqon ke ilawa bhi khalis Shehad ko check karne ke bohat se tarike hain, jin mein se kuch to intehai khatarnaak hain aur kuch bohat mashkook, is liye aap oopar bayan kardah tareeqon se hi khalis Shahad ki pehchan kar lijiye, taham maloomat ki gharz se baqiya tarike bhi tehreer kiye ja rahay hain.

  • Shehad ke khalis honay ki aik pehchan ye bhi hai ke Diabetes ke mareezon ko khalis Shehad istemaal karayen to un ki Sugar nahi barhti. Shehad khanay se agar sugar barh jaye to wo Shehad naqli ho ga.
  • Aam gharelo makhi ko zindah pakar kar phurti se Shehad mein adhay ya pawan inch tak duubo kar nikala jaye. Agar to makhi urr jaye to is ka matlab hai ke Shehad asli aur khalis hai, kyunkay naqli aur jaali Shehad honay ki soorat mein sheerah waghera makhi ke par aur jism se lapat jata hai jis se makhi urr nahi sakti.
  • Roti ke tukre par achi terha Shehad daal kar kisi bhukay kuttay ke agay daal den. Agar Shehad khalis hua to kutta bhooka honay ke bawajood roti nahi khaye ga. Jabkay agar Shahad naqli hua to kutta bakhushi is ko kha jaye ga.
  • Thora sa Shehad haath ki pusht par laga kar is par choona milein agar haath mein se garmi si niklay to Shahad asli hai. Basorat deegar Shehad naqli hai.
  • Shehad ko kaghaz par laga kar pencil se lakerain lagayen. Agar Shehad na phailay to yeh real & pure hai.
  • Shehad mein choona daal diya jaye aur agar choona na phoolay to ye asli hai. Aur agar choona phail jaye to Shehad naqli hai.
  • Lahsun ki ghuthli ko thori der ke liye Shahad mein dalain, agar nikaalte ke baad lahsun ki bo mar jaye to samjhain Shehad asli hai.
  • Maiday mein zakham wala mareez agar Shehad khanay ke baad qay kar day to ye Shehad ke asal honay ki alamat hoti hai. Aur isi terha antadiyon mein zakham walay mareez ko agar khalis Shahad khilaye jaye to usay dard ho ga.

Khalis Shehad ki pehchan (pure honey test at home) ke hawala se agar koi cheez aap ki samajh mein nahi aayi hai ya aap is tehreer ke hawala se mazeed maloomat haasil karna chahtay hain to aap hamein comments kar satke hain. Aap ke har sawal, har comments ka jawab diya jaye ga.

Agar aap ko ye tehreer achi lagi hai to aap ka haq banta hai ke isay social media par share kya jaye, taakay aap ke dost ahbaab ki bhi behtar tor par rahnumaiye ho sakay.