Chehre Ki Khubsurti K Liye Kheere Ka Mask Banana
Ladies Corner

Chehre Ki Khubsurti K Liye Kheere Ka Face Mask Banana

Aap ke chehray ki naram o mulaim jald aap ki dilkashi mein ahem kirdaar ada karti hai. Husn o khoubsurti ke husool ke liye kheera aik umdah aur behtareen qudrati shai hai. Kheere ko khaya jaye ya chehray par mask ki soorat mein lagaya jaye. Har terha se ye insaan ke liye faida hi deta hai.

Kheere ke insani sehat par kya asraat hotay hain is baray mein aap ne kaafi baatein suni hon gi, lekin Kheere ko bator husn o khubsurti istemaal karne ke baray mein shayad kam hi se suna ho. Kheere mein mojood ajzaa aap ki jald ko naram o mulaim, be daagh aur khobsorat bana kar thandak ka ehsas dete hain.
Kheera sooraj ki tapish se jhlsi hui jald ko theek kar deta hai. Aur jald ko tar o tazah aur saaf o shafaaf banata hai. Kheera aankhon ke liye bohat mufeed hai. Aankhon ki soojan, thakawat aur siyah halqon ko kam karne mein kheera bohat umdagi se kaam dekhata hai.

Kheere ka face pack:

Kheere ko aankhon par aayi pad ke tor par istemaal kya jata hai, aankhon par is ke slice rakhen aur aaraam se late jayen. Das se bees minute tak sukoon se laitee rahen. Is terha herat angaiz tor par aap ki ankhen fresh ho jayen gi.

Kheere ke andar pani ki waafar miqdaar mojood hoti hai jo aap ki jald mein qudrati nami ko barqarar rakhti hai. Kheera jald ki safai karta hai aur jild ke daagh dhabbay daur kar kay unhein jaazib nazar aur purkashish bananay mein ahem kirdaar ada karta hai. Ilawa azeen jhuriyon aur soozish ke khatmay ka sabab bhi bantaa hai.

Kheere ka mask bananay ka tareeqa

Kheere ka mask jald ko naram o mulaem karta hai aur be daagh banata hai jabkay is ka juice jald ke liye bohat mufeed hai.

1. Kheere ka face mask banana

Chaar Paanch taaza podina ke pattoun ko bland kar len aur aik Kheere ko chheel len aur is ke beej nikaal den, podina ke paase pattay aur Kheere ko bland kar ke puori si bana len.

Anday ki safedi phaint len ab anday ki safedi mein Kheere ki piyouri mix kar len, is paste ko chehray par lagayen aur bees minute ke liye sukoon se late jayen, phir saada pani se chehra dho len aur huwa mein khushk honay den.

Ye amal haftay mein do se teen martaba karne se aap ki jald naram o mulaem aur khobsorat ho jaye gi. Aur chehray se tamam daagh dhabbay khatam ho jayen.

2. Khushak jald ke liye kheeray ka mask

Kheeray ko chheel kar is mein dahi shaamil karen. dono ajzaa ko balnd kar kay piyoori si banalen. Sab se pehlay apne chehray ko neem garam pani se dhoo len taakay aap ke chehray ke massam khil jayen.

Mooo dhonay ke baad chehray ko toliye se saaf karlen. Baad azan chehray par kheeray aur dahi ke mixture ki moti se teh golai ki shakal mein lagayen. Aur 10 se 15 minute baad usay pehlay neem garam pani se dho len, bad azan usay thanday pani se dho len.

Chehra khushk honay ke baad Zaitoon ke tail ke 2 se 3 qatray chehray par apply karen taakay jald naram o malaim rahay. khushk jald ke liye kheeray ka yeh sab se behtareen mask hai. Is se khushk jald na sirf jhuriyon se pak ho jaye gi balkay tar o tazah bhi dikhayi day gi.

3. Teesra tareeqa

Kheere ko bland karen aur usay chehray, gardan aur aankhon par laga len. Pandrah se bees minute ke liye laga rehne den. Is tarike ke musalsal istemaal se jald chand dinon mein hi daano, black heads, jhuriyon aur khushki se nijaat haasil kar layte hai.

4. Dosra tareeqa

2 adad Kheere len aur un ko baghair cheele slice ki shakal mein kaat len, aadha glass malik kareem len, aik chamach o live oil, aik chamach shehad aur aik chamach mltani matti len, un tamam ashya ko blander mein mix kar len phir fridge mein usay rakh kar tees minute tak thanda honay den.

Is douran chehray aur gardan ko lemon se saaf karen. Usay khushk honay se qabal hi Kheere ka mask gardan aur chehray par lagayen. Ab hua mein khushk honay den, phir malik kareem ya balai laga kar saaf kar ke utaar len. Aur saada pani se chehra aur gardan dho len.

5. Choutha tareeqa

Aik chaye ka chamach doodh, aik chaye ka chamach Kheere ka ras aur paanch qatray arq ghulaab mix karen aur chehray aur gardan par laga len, pandrah minute baad usay saaf kar den. Ye nihayat shandaar whitener hai, jisay aap waqtan foqatan apne chehray par laga sakti hai.

6. Kheere ka mask

Kheeray ko chheel kar achi tarah pees len. itna peesain ke paste ban jaye. Ab is mein arq ghulaab, lemoo ka ras, pissa huwa podina aur shehad daal kar achi tarah mix karen phir anday ki safedi ko achi tarah mix karen.

Anday ki safedi ko achi tarah phaint kar is mixture mein daal den. Jab achi tarah mix ho jaye to usay chehray aur gardan par laga len. Aur aankhon se bacha kar lagayen. 25 minute laga rehne den phir neem garam pani se dho len. aap ki skin mein taazgi aur chamak aa jaye gi. Behtareen result ke liye haftay mean aik dafaa yeh totka zaroor istemaal karen.

Hassas jald ke liye Kheere ka istimaal

Hassas jald wali khawateen apne chehray ki jald ko tar o tazah aur shadaab rakhnay ke liye kya kya jatan nahi kartin, kitney mehangay lotion istemaal karti hain taakay kisi qisam ka side effect bhi na ho aur wo khobsorat chehray ki maalik bhi ban jayen,

lekin phir bhi un ki marzi ke nataij haasil nahi hotay. Kyunkay hassas jald doosri tarz ki jldon ki nisbat intehai naazuk hoti hai is liye kisi bhi qisam ke cosmetics ke istemaal se is jald par alargi waghera ke masail samnay atay hain.

Anday ki safedi ko aik piyaale mein daal kar achay se phaintain ke is ke opar jhaag si ban jaye. Ab is mein aik chamach shehad aur aik chamach taaza dahi daal kar achi terha mix karen. Jab ye sab achi terha se mix ho jaye to is mein aik chamach Kheere ka ras shaamil karen avrsb cheezon ko yakjaan kar len.

Ab chehra achay se dho len aur is par ye mask lagayen. Aur 15 minute tak laga rehne den jab mehsoos ho ke mask khushk ho gaya hai to neem garam pani ke sath chehray ko dho len.

Kheere ke mask se mutaliq agar koi cheez aap ki samajh mein nahi aayi hai ya aap is tehreer ke hawala se mazeed maloomat haasil karna chahti hain to aap hamein comments kar sakti hain.

Aap ke har sawal, har comments ka jawab diya jaye ga. Taham agar aap ko ye tehreer achi lagi hai to aap usay social media par bhi share kar sakti hain. Taakay aap ki shlyon waghera ki bhi behtar tor par rahnumaiye ho sakay.