Ghussa kam karne ke tarike - Gusse ke nuqsanat aur ilaj
Morality

Ghussa kam karne ke tarike – Gusse ke nuqsanat aur ilaj

Ghussa aana insan ki aur is par qaboo paana momin ki nishani hai. Gussa hamaqat se shuru hokar nedamat par khatam hota hai. Gussa karna dosray ki ghalti ki saza khud ko dena hai.

Ghusse ka manfi andaaz mein izhaar baaz auqaat pareshani ka sabab ban jata hai, khaas tor par tab jab is se kisi ko nuqsaan pounchanay ya kisi ke jazbaat majrooh honay ka khatrah ho.

Ghusse ke waqt sahi faisla lena ya sochna samjhna is liye bhi mushkil hojata hai chunkay ghhussa ban bulaye aata hai aur zehan ko kuch der ke liye sun kar daita hai.

Gussa wo cheez hai jis se insaan ke andar sakht hejaan peda hota hai, chehra surkh hojata hai, dil ki dharkan barh jati hai, nabz ki raftaar taiz ho jati hai, saans charhne lagti hai hatta ke aik sanjeeda o khobsorat insan khofnaak aur wehshat naak shakal ikhtiyar karleta hai.

Sirf yahi nahi ghusse ke wajah se insan aisi harkaat kar baithta hai jo is ke liye halakat o barbadi ka sabab ban jati hain.

Shayad yahi waja hai ke ziyada tar log gusse se bachne ke liye internet par kuch is tarah se search karte dekhai dete hain, Gussa kya hai, gusse ke nuqsanat kya hain, gussa haram kyun hota hai, gusse ka control karne aur gussa na karne ke tarike kon se hain, gusse par qabo pane aur gussa na karne ka tarika in Urdu and hindi,

Ghussa kam karne ke tarike aur gusse ko kaise khatam kya ja sakta hai, Gusse ilaj kaise mumkin hai waghera waghera, agar aap bhi yehi kuch search kar rahe hain to ye tehreer aap he ke liye hai.
Insaan kitna hi bara kyun na ho jaye andar se bacha hi rehta hai, is wajah se log bachon ki terha chahtay hain ke har cheez un ki marzi ke mutabiq ho aur jab aisa nahi hota to wo ghusse mein aajate hain. Aaj ke daur mein logon mein qowat bardasht bohat kam hogayi hai. Jis ki wajah se inhen choti choti baton pay gussa ajata hai.

Agar koyi aap ko dhoka day, aap ko nuqsaan pohanchanay ki koshish karye, ya aap ko bina kisi wajah ke tanqeed ka nishana banaye to aap ko gussa anay lagta hai.

Ghusse ka tameeri andaaz mein izhaar aksar mushkil ho jata hai kyunkay gussa ke waqt insaan jazbaat mein beh kar sahih aur ghalat ki tameez bhool jata hai aur is ka gussa mamlaat ko behtar bananay ke bajaye un ke bigaar ka sabab ban jata hai.

Tum insaan ke dil mein chaako ghonp kar bahar nikaal satke ho lekin chaako ke bahar niklny ke baad tum hazaar baar bhi moazrat karo maffi mango is ka koi faida nahi ho ga wo zakham apni jagah baqi rahay ga.

Yaad rakho zabaan ka zakham chaako se kahin bad tar aur dard naak hota hai. Is liye ghusse na karo, kyun kay qabil se qabil aadmi ko bhi be waqoof bnadita hai. Kehte hain ke insaan ki aqal ka andaza ghusse ki haalat mein lagana chahiye.

Log kehte hain ke unhein tab gussa aata hai jab koi ghalat baat ya kaam ho. Lekin, baat to tab hai ke koi gaari ounchay neechay raastoon par bhi achi chalay kyunkay hamwar sarrak par to har gaari achi chalti hi hai.

Aik larke ko gussa bohat ziyada aata tha. Baat baat par taish mein ajata tha. Is ke baap ney is ko bola ke ab jab bhi tumhe ghussa aeye ga aur tum cheekho ge ya kisi ko maro ge to is ke baad tum ney bahar ja kar dewar mein hathori se keel thokna hai. Jaisay hi larka gussa karta, ba har ja kar deewar mein keel thokta.

Pehlay din is ney raat ko sonay se pehlay jab keel gannay to poooray paintees keel they. Thora sa sharminda huwa aur samajh gaya ke is ko ilaj ki zaroorat thi.

Aglay din phir isi terha tees keel they. Har guzarte din ke sath kilon ki tadaad kam hoti ja rahi thi kyunkay keel thoknay mein jitni der aur jaan lagti thi larka sochta tha ke is se bohat behtar tha ke wo gussa na karta to wo aksar khud ko rokk laita.

Isi terha karte karte aik din aisa aaya ke usay koi keel thokna nahi para. Chunancha is ney apne baap ko bataya. Baap ye sun kar bohat khush huwa aur bola ke ab se tumhari nai dew tea hai, ab jab bhi tum ghusse ko control karo ge to bahar ja kar pehlay se lagaye hue aik keel ko bahar nikaal lena.. Theek hai ?

Larka maan gaya. Phir jab bhi is ko gussa aata aur wo apna ghussa pi jata to bahar ja kar dewar se apne puranay thonktay hue kilon mein se aik nikaal laita. Jis din saaray keel nikaal liye to is ney apne baap ko bataya ke abbu mein ney aaj saaray keel nikaal liye hain.

Baap ney is ko shabash di aur bola ke aao mere sath deewar ko dekhen. Deewar ki haalat dekhi to is mein sorakh hi sorakh they.

Beta tum ney apne ghusse ko control kar ke bohat acha kyalikn ab is deewar ko zara ghhor se dekho! ! Ye pehlay jaisi nahi rahi is mein ye sorakh kitney buray lag rahay hain, jab tum ghusse se chikhte chilatay ho aur ulti seedhi batain karte ho to is deewar ki terha tumhari shakhsiyat par bhi bohat bura assar parta hai

Ye bhi parhiye : Hasad kya hai, Hasad ke nuqsanaat aur hasad se bachney ke tarike

Ghusse mein bolay hue alfaaz kisi ka bhi dil dikhata hain, logon ki dil aazari karte hain. Waqt ke sath sath gussa to khatam ho jata hai magar is se hum dosaron ko jo chout lagatay hain wo un sorakhon ki terha un ke dil par hamesha apne nishaan chor deti hai.

Is liye yaad rakho ke ghussa behtareen dosti aur mazboot tareen naaton ko naist o naboot kar deta hai. Is se hadd darja parhaiz karo.

Jab koi aap ko gussa dilaata hai to aap ki jazbati kefiyat aap ko yato bhagnay ya phir maqabala karne ke liye tayyar karti hai. Is se aap ko taaqat bhi millti hai aur apna difaa karne ki himmat bhi.

Is qowat aur jazbati behkawo kaا jism se ghusse ki shakal mein bahar niklana zurori hai. Agraysa na ho to ye jama hotay hotay jism o zehan par manfi asraat muratab karna shuru kar deta hai.

Ghusse ke baare mein qurani ayaat

Guran majeed mein Allah taala ney ghusse par qaboo panay walon ki tareef farmai hai :

Wo log jo barray gunaaho aur be hiyai ke kamon se bachte hain aur jab ghusse mein atay hain to maaf kar dete hain. Aur farmaya :

Wo log jo khusi aur takleef mein kharch karte hain aur ghusse ko pi jany walay hain.

Agar tumhe shetan ki taraf se cho ka lagey (yani shetan ghusse ko mushtael kar day ) to Allah ki pana maang yaqeenan wohi suneney wala, jan-nay wala hai.

Allah talah ney jahan apne momin o mukhlis bundon ki mutadid sifaat bayan ki hai wahein un ki ye sifaat bhi bayan ki hai “Yani wo apne ghusse ko pi jatay aur rok letay hain aur qudrat ke bawajood halm se kaam le kar afoo o dar guzar se kaam letay hain.”

Hadees mubarikah

Hazrat abbu huraira (RA) se rivayet hai ke Rasool Allah (SAW) ney farmaya : Bohat ziyada taaqatwar wo nahi jo ( maqabil ko ) bohat ziyada pacharnay wala hai, bohat ziyada taaqatwar sirf wo hai jo ghusse ke waqt apne aap par qaboo rakhay.

Sulaiman bin sard (RA) se rivayet hai ke mein Nabi Akram (SAW) ke paas betha tha, wo aadmi aapas mein gaali galoch kar rahay they in mein se aik ka chehra surkh ho gaya aur galay ki ragein phool gayeen to Nabi Kareem (SAW)ney farmaya :

”Mujhe aik aisa kalma maloom hai ke ke agar ye wo kalma keh le to is ki ye haalat khatam ho jaye, agar ye keh le : ( اعوذ باللہ من الشیطان الرجیم ) to jo kuch is par guzar rahi hai khatam ho jaye.

Ibn Abbas (RA) se rivayet hai ke Rasool Allah (SAW) ney farmaya : Jab tum mein se kisi ko gussa aeye to khamosh ho jaye.

Ghusse par qaboo kaisay paaya jaye ?

Kamyaab zindagi guzaarne ka raaz ye hai ke aap apne jazbaat ke tabay nahi balkay jazbaat aap ke tabay hon. Ghusse ko apna tabay bananay se pehlay is ke peechay chhupi wajah ko samjhna zurori hai. Gussa aksar kisi gehri chout ki wajah se aata hai. Maazi mein hum ney jo jo takaleef bardasht ki hoti hain wo agay chal kar hamaray ghusse ki wajah ban jati hain.

Kisi bhi aisi sorat e haal mein jahan hamein dukh ya chout pounchanay ka khatrah ho ghussa hamara pehla rad-e-amal hota hai. Ye is takleef se bachney ya usay chupaney ka aik tarika hota hai. Takleef daur karne ke liye is ko tasleem karna zurori hai. Hamein samajhney ki zaroorat hai ke agar hamein gussa araha hai to is ka matlab hai ke hamein koi takleef yakoyi pareshani zaroor hai.

Agar hum apni takleef ko pehchanney aur is ko tasleem karne lagen ge to aisi sorat e haal mein hamaray liye apne jazbaat par qaboo pana aur un ka sahi andaaz mein izhaar karna aasaan ho jaye ga. Ghusse ke waqt mehsoos honay wali alamaat ko pehchanney ki koshish karen. Dil ki dharkan taiz ho jana ya jism ka akarna chand aam alamaat hain jo is waqt zahir hoti hain jab aap ko gussa araha hota hai.

Ghusse ke waqt khud se poucheen, ”kya mein itnay ghusse mein hon ke khud pay qaboo nahi rakh sakta? ”agr jawab haan ho to khud ko is jagah se hata len. Khuli fiza mein jayen, lambi lambi sansen len. Gharz ye ke khud ko normal karne ki koshish karen. Ghusse ka musbat andaaz mein izhaar zurori hai.

Agar aap ka khud par qaboo nahi hoga to aap apni baat sahi terha dosray tak pouncha nahi payen ge aur aap ka gussa mazeed barh jaye ga. Jis baat par aap ko gussa hai khil kar is baare mein baat karen. Dosaron ki aara kaahtram karte hue apne khayalat aur atizarat ka izhaar karen. Agar aap dosaron ki soch ka ehtram karen ge to log aap ke muaqqaf ko bhi suneney aur samajhney ki koshish karen ge.

Ziyada gussa anay ki aik wajah ye bhi hai ke hum khauf zada ho jatay hain. Hamein lagnay lagta hai ke agar hum ney ghusse ka izhaar na kya to log hamein daba den ge ya hamari baat ko ahmiyat nahi deingay. Sab se pehlay apne dil se ye khauf nikaal den. Apna bachao karne mein hum apni raye ka izhaar nahi kar paate.

Jab kisi mubahisay ke douran aap ko gussa anay lagey to pehlay to lambi lambi sansen len ( is se aap ke liye apne jazbaat par qaboo paana aasaan ho jaye ga phir baat karna aasaan ho jaye ga ) aur phir apne ghusse ko dabanay aur chupaney ke bajaye khud itmadi se is ka izhaar karen aur is ki wajah bitayen. apne jazbaat ko zabaan den.

Jis din aap ko apne jazbaat ko ba-maani aur musbat alfaaz ki shakal dena aajay ga is din aap ka gussa aap ka dushman nahi balkay dost ban jaye ga !

Logon ko ziyada ghussa anay ki aik wajah ye bhi hai ke wo pani kam peetay hain aur werzish nahi karte, jabkay media mein dekhaya jany wala tashadud bhi is ki aik wajah hai.

Gussa ke ilaj – Gussa khatam karne ka tarika

Gussa aik aisa ikhlaqi marz hai ke agar fori aur sahih ilaj na kya gaya to is ka assar bahami na ittifaqi, hasad o keena, bughz o nafrat, gaali o galoch hatta ke marpeet, qatal o khonriz y, talaq aur maal o aulaad par bad dua ki shakal mein zahir hota hai, is liye apne deen o imaan par harees shakhs ke liye zurori hai ke is marz ka ilaj kere. Aur un asbaab se parhaiz kere jo gussa berhate hain

Hazrat sulaiman ban srd (RA) bayan karte hain ke do aadmi Nabi Kareem (SAW) ke paas gaali galoch kar rahay they in mein ka aik ghusse mein agaya, is ka chehra surkh hogaya aur is ki ragein phool gayeen,

Rasool Allah (SAW) ney is ki taraf dekha aur farmaya : mein aik kalma jaanta hon ke agar ye usay keh le to is ki ye kefiyat daur ho jaye, wo kalma hai. اعوذ باللہ من الشیطان الرجیم (mein shetan mardood se Allah ki pana chahta hon ) chanacha jin logon ney Nabi Kareem (SAW) ka ye farmaan suna in mein se aik shakhs is ghussa honay walay shakhs ke paas gaya aur kehnay laga :

Kya tum jantay ho ke abhi abhi Allah ke Rasool (SAW) ney kya farmaya : is ney jawab diya : nahi, Aap (SAW) farma rahe hain ke hain mein aik aisa kalma jaanta hon jisay agar ye parh le to is ka gussa jata rahay, wo kalma hai : اعوذ باللہ من الشیطان الرجیم is shakhs ney kaha ke kya to mujhe pagal samajh raha hai. (Sahih bukhari and Sahi muslim)

Allah aur is ke Rasool (SAW) ki itaat : Yani aik momin ye soochey ke Allah aur is ke Rasool ney gussa anay par sabr se kaam lainay aur logon ki ghalti ko maaf kardainay ka hukum diya hai,
Allah taala irshad farmata hai : Aur bhalai aur burai barabar nahi hosakti. To ( sakht kalami ka ) aisay tareeq se jawab do jo bohat acha ho ( aisa karne se tum dekho ge ) ke jis mein aur tum mein dushmani thi goya wo tumhara garam josh dost hai

Is aayat ki tafseer karte hue mufassir Quran Hazrat Ibn Abbas bayan karte hain ke, is se morad gussa ke waqt sabr karna aur burai ko maaf karna hai.

  1. Allah o Rasool (SAW) ki mohabbat : Allah ke Rasool (SAW) ney banou qais ke 1 shakhs se farmaya : tumahray andar do aisi adaten hain jinhein Allah aur is ke Rasool pasand karte hain, bard baari aur sanjeedgi. ( Sahih muslim ). Burdbaari yani gussa ki haalat mein intiqam ki taaqat ke bawajood sabr se kaam lena.
  2. Jannat mein dakhla : Aik sahabi ney sawal kya ae Allah ke rasool mujhe koi aisa amal batlaaiyye ke is par amal krlon to mujhe jannat mil jaye, Aap (SAW) ney farmaya : gussa na karo tumhe jannat mein dakhla mil jaye ga.
  3. Allah ke gazabb se bachao : 1 shakhs Nabi (SAW) se sawal karta hai ke wo konsa amal hai jo mujhe Allah ke gazabb se mehfooz rakhay aap ney farmaya : tum gussa na karo (Allah taala tum par bhi ghussa na hoga).
  4. Bohat barray ajar ka husool : Irshad nabwi hai ke : Allah taala ke nazdeek gussa ka ghoont pi jany se ziyada ajar wala koi aur ghoont piinaa nahi hai.
  5. Jannat ki hoor : Arshad e Nabi (SAW): jo shakhs intiqam ki qudrat ke bawajood gussa pi jata hai to Allah taala qayamat ke din is shakhs ko tamam makhloqaat ke samnay bulaa kar farmaiye ga ke aaj tum jannat ki jis hoor ka intikhab karna chaho jaakar intikhab karlo.
  6. Zikar Ellahi : Jaise اعوذ باللہ من الشیطان الرجیم parhna. Jisa ke zair behas hadees mein bayan huwa hai.
  7. Jis haalat prhe usay badal day : Nabi (SAW) ka irshad hai ke jab tum mein se kisi ko gussa aeye agar wo khara hoto baith jaye aur agar betha hoto late jaye. aur agar munasib samjhay to wo jagah chor kar hatt jaye.
  8. Khamoshi : aap (SAW) ka irshad hai : agar kisi ko gussa aeye to wo khamosh ho jaye.
  9. Buray nataij par ghor : ghussa ko pi jany ka aik behtareen ilaj ye hai ke dainee o dunewi nataij par ghhor kere ke basa auqaat 1 shakhs gussa mein aisi baat kar jata hai ya aisi harkat ka murtakib hota hai jis se is ki duniya o akhirat barbaad ho jati hai.

Agar aap ko ye tehree achi lagi hai to aap is tehreer ko social media par bhi share kar sakte hai, shukria.