High Blood Pressure ki alamat aur wajohat in Urdu
Disease Symptoms

High Blood Pressure ki alamat aur wajohat

Buland fashaar khoon jisay English mein High Blood Pressure kaha jata hai, dil ke doray aur stroke ka aik bara sabab hota hai, lekin bohat se log is ke bare main kuch bhi nahi jante.

Is tehreer mein hum bat karen gay ke Blood Pressure kya hai, High Blood Pressure ki alamat aur wajohat kya hain. Causes and symptoms of high blood pressure in Urdu.

Blood Pressure

Hamara dil aik chota magar taaqat war pump hai jo baqaidagi se dharakata hai aur har aik minute mein jism mein phaily hui un-ginat ragon mein 5 letter khoon pump karta hai. Khoon ki is gardish ko barqarar rakhnay ke liye nizaam douran khoon mein dabao ka hona zurori hai. Yahi dabao blood pressure kehlata hai.

Din bhar ke douran blood pressure ki satah mein tabdeeli waqay hoti rehti hai. Jab aap werzish kar rahay hon ya dabao mein hon to blood pressure barh jata hai. Jism jab aaraam da haalat mein ho ya aap so rahe hon to phir is ki satah gir jati hai.

Dilchasp baat yeh hai ke Doctor ya Nurse se checkup kerwatay hue blood pressure khud ba-khud barh jata hai. Tibbi istilaah mein isay white coat hypertension kaha jata hai. Aisi soorat mein agar aap ghar par blood pressure monitor rakhen aur reading letay rahen to blood pressure ki bilkul durust soorat e haal aap ke samnay aa jay gi.

Rozana ya har haftay blood pressure check karne ki zaroorat nahi agar aap High Blood Pressure ki dawa le rahay hain aur yeh control mein hai to phir har chand mah ke baad check karwa lena kaafi hai, ba-soorat deegar har chand haftay baad checkup karwa lena chahiye.

Agar blood pressure normal hai to phir saal mein 2 se ziyada baar check karwane ki zaroorat nahi. Ziyada tar doctor yeh baat tasleem karte hain ke 130/80 blood pressure ya is se kam qabil qubool hai.

Agar aap diabetes ke mareez hain ya dil ke aarze mein mubtala hain to phir reading is se kam hona ziyada behtar hai.

Ye bhi parhain: Sakoon kya hai aur kaise hasil hota hai?

Ho sakta hai aap High Blood Pressure ka shikaar ho magar is ka maloom tak nah ho? Jee haan waqai ho sakta hai aap apne blood pressure ko mamool par samajh rahay ho kyunkay aap khud ko theek samajh rahay hotay hain magar kya aap ko maloom hai is bemari ke shikaar honay walay aksar afraad ko kisi qisam ki jismani alamaat ka saamna nahi hota?

High Blood Pressure ki alamat aur wajohat – Causes and symptoms of HBP in Urdu

Dar haqeeqat High Blood Pressure ki aisi koi alamaat nahi jin se is ka pata chal sakay aur yeh is waqt daryaft hota hai jab aap ki sahet ko nuqsaan pohanchna shuru hota hai.

120/80 ya is se kam blood pressure mamool ka hota hai taham agar yeh 140/90 ya ziyada hoto aap ko ilaj ki zaroorat hoti hai aur chunkay har aik is ka shikaar ho sakta hai taham kuch makhsoos afraad mein is ka khatrah ziyada hota hai.

Yahan aisi 5 khamosh alamaat ke barey mein janay jo logon mein blood pressure ka khatarah zahir karti hain.

1 Aap darmiyani umar ya boorhay ho chukay hain

Tibbi mahireen ke mutabiq waisay to blood pressure kisi bhi umar mein barh sakta hai magar is ka khatrah 40 saal ke baad taizi se barhna shuru ho jata hai. Aap gharri ko to peechay nahi kar saktay magar apne blood pressure ke checkup ko zaroor mamool bana saktay hain.

Ghar mein blood pressure check karne ka aala ab aam hai aur usay zaroor rakhna chahiye khaas tor par agar aap Doctoron ka rukh kam karte ho to. Aksar blood pressure ke mareez aisay hotay hain jo is se la-ilm hotay hain aur doctoron ke paas jana nahi hota aur aisa nah karne ki soorat mein mukhtalif bimarion jaisay amraaz qalb waghera ka khatrah barh jata hai.

2 Makhsoos tarz zindagi

Agar aap din ka ziyada waqt baith kar guzartay hain, tambaku noshi ke aadi hain aur bohat ziyada namak wali ghiza pasand karte hain to aap mein blood pressure ka khatrah bohat ziyada hota hai.

Dar-haqeeqat tarz zindagi aap ko buland fashaar khoon ke sangeen khatray se dochar kar deti hai. Is se bachney ke liye har haftay 150 minute ki motadil jismani sar-garmion ko apnane ki koshish karen.

Agar aap ki mulazmat hi baith kar ki janay wali hai to bhi kuch der baad taiz chehal qadmi ka waqfa len. Apni ghiza mein namak ka istemaal kam kar dein aur tambaku noshi se guraiz karne ki koshish karen.

3 Motapay ke shikaar

Agar aap motapay ke shikaar hain to yeh High Blood Pressure ke khatray ki sab se barri alamat hai. Khaas tor par agar aap ki tond nikli hui hai to yeh lag bhag 100 % yakeeni ho jata hai.

Magar achi khabar yeh hai ke agar aap apne wazan mein mehez 5 kilogram tak ki bhi kami le aeye to is se blood pressure ki satah mein kami aa jati hai.

4 Khandan mein blood pressure ki tareekh

Agar aap ke khandan mein kabhi koi High Blood Pressure ka mareez reh chuka hai aur yeh aap ko bhi khatray mein daal deta hai.

Tibbi mahireen ka kehna hai ke agar khandan mein blood pressure ka mareez ho ya kabhi raha ho to yeh zurori hai ke aap is ke liye pehlay se tayyari shuru kar dein aur apna checkup karate rahay taakay woh ziyada sangeen masla nah ban sakay.

5 Mukhtalif amraaz mein mubtala hona

Agar aap ke andar kuch makhsoos amraaz jaisay Diabetes, Gurdon ke amraaz, High Cholesterol ya thyroid ke amraaz ki tachkhees hui hai to High Blood Pressure ka khatrah bhi dugna barh jata hai. In amraaz ke ilaj ke liye di janay wali adwiyaat blood pressure badhaane ka bhi baais ban sakti hain.

Agar aap ko ye tehreer achi lagi hai to aap ka haq banta hai ke apne dosto ke sath is post ko share kya jaye, agar aap is tehreer ke hawale se mazeed maloomat hasil karna chahte hain to aap hume comments bhi kar sakte hain. aap ke har sawal her comments ka jawab diya jaye ga.