Kharaton ka desi ilaj in Urdu
Natural Treatment

Kharaton ka desi ilaj in Urdu – Snoring Treatment in Urdu

Duniya mein jitni bhi bemariyan hain wo insaan ko khud bardasht karni parti hain. Lekin kharatay maarna Duniya ki wo wahid aur anokhi bemari hai jis mein takleef doosron ko hoti hai aur bemari mein mubtala shakhs ko pata hi nahi hota.

Kharaton ko Gehri Neend ki alamat samjha jata hai, Is liye jab thakan ziyaada ho to kharatey bhi bohat gehray aur taiz hotay hain. Lekin is haqeeqat se inkaar mumkin nahi ke jis kamray mein khratey maarny wala shakhs mojod ho, wahan kisi aur ko neend aa jaye is ka to sawal hi paida nahi hota.

Kharatay maarna aik aisa umomi masla hai ke jis ko sanjeedgi se nahi liya jata. Halaank kharatay maarny wala shakhs na sirf Sleep Apnea nami bemari ( sotay hue saans ruknay ka amal ) ka shikaar hotaa hai. Balkay usay Heart Attack tak ho sakta hai.
Is ke elava kharatay maarny walay afraad hamesha thakey thakey nazar atay hain aur jald uktahat ka shikaar ho jatay hain. Kharaton ka masla khawateen ke muqablay mein mardon mein kahin ziyada hota hai.

Kharatay maarna aik khatarnaak aadat

Ziyada tar log kharaton ko bemari tasleem nahi karte. Halaank kharatay maarna aik aisi khatarnaak aadat hai jis se na sirf saans mein khalal parta hai balkay ye aadat dil ki bimarion ke khatraat ko bhi barha deti hai.

Ilawa azeen khratay maarny walay ashkhaas neend ki kami ka shikaar ho jatay hain. Jis ki barri wajah sotay hue saans roknay ka amal hai. Jis ke baais wo raat ko mutadid baar jaag jatay hain.

Neend mein kami aur kharaton mein zayadati mutadid masail ka sabab ban sakti hai. Baaz auqaat to kharaton ki aawazian inthai khofnaak roop dhaar layte hai.

Kharaton ki shiddat mein izafah na sirf ghar walon ki neend ke liye tabah kin ho jata hai balkay is se kharatay maarny walay shakhs ke dimaghi afaal bhi mutasir hotay hain jin se Depration, Faalij, Dil aur Dimagh ki bimarion samait mukhtalif amraaz ka khatrah barh jata hai. Lehaza kharaton mein shiddat ki soorat mein fori tor par apne mualij se rujoo karna chahiye.

Kharatay maarna gharelo nachaki ki wajah ban sakta hai

Hamaray haan ye tasawwur aam hai ke kharatay maarna aik aisi bemari hai jis ka ilaj na bhi karwaya jaye to koi baat nahi. Kyunkay ye bemari hamein koi takleef nahi deti. Halaank ye aik aisi khatarnaak bemari hai jis mein mareez ko kuch ho na ho, doosron ko ziyada takleef uthana padtee hai.

Kharaton se duniya ka har shakhs panah mangta hai. Kyunkay jis kamray mein kharate lainay wala shakhs mojood ho wahan koi aur shakhs so hi nahi sakta. Balkay aap ki shareek hayaat tak alehda kamray mein sonay par majboor ho jati hai.

Jis ki wajah se kharatay maarny walay shakhs ki azdawaji zindagi khatray se dochar ho sakti hai. Kyunkay aik tehqeeq ke mutabiq talaq ka sabab ban’nay wali wajohaat mein se kharatay lena bhi aik barri wajah hai.

kharaty khatam karne ka ilaj

Kharaton ki wajah se mghrbi mlkon mein biwiyon shohar ko chor kar bhaag rahi hain. Un mulkon ki adalton mein har saal hazaron biwiyan tilaq lainay ke liye rujoo karti hain. Aur haqeqat bhi yahi hai ke wo aisay afrad se peecha chorra kar hi sukoon aur chain ki neend so sakti hain.

Kharaton ki wajohaat

Kharatay is waqt ziyada anay lagtay hain jab hamaray galay aur nathnon se hawa asani se nahi guzar pati aur ye ird gird tissues mein harkat hoti hai aur un ki gardish ki wajah se kharaton jaisi aawaz peda hoti hai.

Science danon ka kehna hai ke jab hum sotay hain to hamari gardan ke pathay sukoon mein atay hain aur baaz auqaat wo is qader pursukoon ho jatay hain ke hamaray oopar wali saans ki naliyan band ho jati hain jis ki wajah se hawa pehphron tak pounchanay ke liye jagah na milnay ki wajah se kharatay anay lagtay hain.

Taham kharatay maarny ki darj zail wajohaat hain :

  • kharatay maarny ki barri wajah naak ki barhi hui haddiyan, Naak mein Infection aur Soojan hoti hai.
  • Kharatay maarny ki doosri wajah naak ka band hona hai aur ye alamaat aksar Sardiyoon mein dekhnay mein aati hai.
  • Kharate maaray ki teesri barri wajah Alchohal ya Neend wali golion ka istemaal hai. Kyunkay aisi ashya ke istemaal se insaan gehri neend mein chala jata hai aur gehri neend kharaton ka bohat bara sabab hai.
  • Khratay maarny ki aik aur wajah motapa bhi hai. Ziyada wazan kharaton ke imkanaat ko barha deta hai.
  • Raat ko Dairy Masnoaat ka istemaal karne walay log aksar galaay mein balgham peda honay jaisay masail ka shikaar ho jatay hain, aur phir yahi cheez kharaton ka baais ban jati hai.
  • Tambaku noshi galaay ke tissues ko bahrakna dete hain, jo baad azan kharaton ka baais bantay hain.
  • Chit late kar sonay se galay ke muscles khich jatay hain aur nazdeek aa jate hain, aisa honay se saans lainay par vibration peda hoti hai jo kharaton ka baais banti hai.
  • Aisay log jin ke Tonsils aur Zabaan barri ho aur jin ki gardan ke qareeb ziyada wazan ho to aisay logon ko ziyada kharatay atay hain.

Is bemari mein ziyada tar log Doctoron aur hakeemon ke paas jaaney se katrate hain. Aur internet par kuch is terha se search kar rahay hotay hain.

kharaton ka desi ilaj in urdu hindi

Kharatay kya hotay hain aur kyun atay hain. Kharaton se mukammal nijaat ke azmooda gharelo tarike kon kon se hain. Kharaton ka desi aur qudrati ilaj kaisay mumkin hai?

Kharatay roknay ki Warzish (Exercise) aur Khraton se chutkara panay ke gharelo totkay aur mufeed gharelo nuskhay kon kon se hain? waghera waghera, Agar aap bhi aisa hi kuch search kar rahay hain to yeh tehreer aap hi ke liye hai.

Snoring Treatment in Urdu – Kharaton ka desi ilaj

Ye samjhna ghalat hai ke kharatay sirf Mard letay hain. Aurtain bhi is muamlay mein kisi se peechay nahi hain. Kharaton ka aik aam sabab galay se niklny wali khar kharahat hoti hai.

Is ke ilawa naak se halaq tak ja ne wali naali mein koi nuqs ya rukawat kharatay maarny ka sabab ban sakti hai. Jis ki wajah na kaaf mein ban’nay walay naram massay hotay hain aur saans ki takleef bhi is ka sabab ban sakti hai.

Mahreen ka kehna hai ke darasal neend mein kharate lainay walay shakhs ki zabaan aur jabra dheela par kar peechay ki tarf ho ja taa hai. Jis ki wajah se taalu ya galay ka ko sans ki amad o raft se phar-phrha kar aawaz peda karta hai. Jo kharaton ki soorat mein hamein sunai deti hai.

Roman Urdu mein aaj hum aap ko batayen ge ke aap kharaton ki bemari se kis terha hamesha hamesha ke liye nijaat haasil kar satke hain.

1 Sonay ka andaaz

Agar aap peeth ke bil sotay hain to galay ke muscles khich jatay hain aur nazdeek aa jate hain, aisa honay se saans lainay par vibration peda hoti hai jo kharaton ka baais banti hai, pehlu ke bil sona aap ke galay ke muscles ko qareeb laane se roknay mein madadgaar saabit ho sakti hai,

Is liye jab bhi aap kharatay lainay lagen to apne sonay ki position ko badal len, is se aap foran kharatay maarna chor den ge.

Kharaton se aasaan nijaat ke liye apna sir bistar par 4 inch tak ouncha kar len, yani mota takiya ya ziyada takyon se sir ko ouncha kar len is tarha zabaan galay ko bock nahi kar sakay gi aur saans ki guzargah khuli rahay gi.

2 Motapay mein kami

Kharatay lainay walay aksar mareez over weight ya zayed-ul-wazan hotay hain. Ziyada wazan kharaton ke imkanaat ko barha deta hai. Lehaza koshish karen ke aap ka wazan kam se kam ho, wazan kam karne ke liye aap mukhtalif tarikon ka istemaal kar satke hain.

Neez wazan ghatanay ke liye khoraak ke sath sath werzish par bhi dheyaan den. Aik tehqeeq ke mutabiq agar motapay ka shikaar afraad apna jismani wazan 10 fisad tak kam kar len to na sirf wo kharaton se balkay mun aur naak ke dosray masail se bhi bach satke hain.

3 Podeenay ki Chay ya Tail

Podeenay ka tail kharaton se nijaat dilata hai. Ye tail soozish khatam karne mein ahem kirdaar ada karta hai. Aur naak ki androoni part ki jhilion mein soozish kam karne mein madad deta hai. Is ko istemaal karne ke liye podeene ke tail ke chand qatray apni ungli par dalain. Aur naak ke ird gird aur naak ke dono atraaf mein zaireen jagah par lagayen.

Saans ki bimarion aur allergy ki wajah se saans ki naali mein soozish ho jati hai jo kharaton ki wajah banti hai aisi sorat e haal mein raat ko sonay se aadha ghanta qabal podeenay ki chaye bana kar piinaa kharaton se nijaat dilata hai.

Podeenay ki chaye ka istemaal saans ki naali ki soozish ko khatam karta hai. Aur pehphron ki chipchipahat door hoti hai.

Kharaton se nijaat ke liye aap podeenay ke tail ke chand qatray pani mein daal kar is ki bhaap bhi le satke hain. Aur is pani ke sath ghararay karne se bhi ye marz daur ho jaye ga.

4 Naak ko saaf rakhna

Kharatay lainay walay afraad khud ko bebas mehsoos karte hain. Inhen pata nahi hota ke wo kharaton ka ilaj kaisay kar satke hain. Kehte hain ke ahthyat ilaj se behtar hai. Is liye naak ko saaf rakhna kharaton se nijaat ka aik saada hal sa hai,

Naak mein jama honay wala kachra saans ki guzargah mein rukawat bantaa hai jis ke nateejay mein mun se saans lena parta hai jo kharaton ka baais bantaa hai. Is liye rozana raat ko sonay se pehlay nathnon ki achi terha safai kar liya karen.

5 Ghararay karna, Bhaap lena

Behti hui naak galay mein rukawat ka baais banti hai, ho sakta hai kamray ki khushk hawa naak se saans lainay mein mushkilaat bherhaye to bhaap ke zariye usay khol kar kharaton se bacha ja sakta hai. Ye tarika is waqt madadgaar saabit hota hai jab kharatay kisi allergy ya nazla zukam ke baais hon.

Agar sonay se qabal garam pani mein namak daal kar ghararay kar liye jayen aur namak ke pani ke chand qatray naak mein bhi tapka liye jayen to is se galay ki taraf saans ki naali kam pholti hai aur kharaton mein numaya kami waqay ho jati hai. Sonay se kam az kam aadha ghanta qabal ye amal agar aik hafta tak kya jaye to kharaton se mukammal nijaat mil jati hai.

6 Ghee aur Zaitoon ka istemaal

Zamane qadeem mein kharaton se nijaat ke liye ghee aur Zaitoon ka istemaal kya jata hai. Ye riwayati tarika ilaj is marz mein bohat faiday mand hai jo na sirf kharaton balkay deegar kayi amraaz ka ilaj bhi hai.

Raat ko sonay ke qabal chand qatray ghee naak mein daal len marz daur ho jaye ga. is ke elava ghee ke chand qatray naaf mein laganay se bhi marz daur hojata hai.

Zaitoon ke tail ke jahan deegar bohat se fawaid hain in mein se aik kharaton se nijaat bhi hai. Naak ka halaq mein zaroorat se ziyada tanao bhi kharaton ki barri wajah hoti hai. Zaitoon ke tail ka istemaal bhi kharaton se nijaat ke liye riwayati ilaj ke tor par hazaron baras se istemaal kya ja raha hai.

Ye tail kharaton se nijaat ke ilaj taloo ke pathon ko mazboot bhi karta hai. Naak mein chand qatray zaitoon ke tail ke daal den to kaafi faida hota hai. Zaitoon ke tail ke do chamach taloo mein laganay se marz daur ho jaye ga.

7 Sahih Adwayat ka istemaal

Alchohal ya neend lainay wali golion se Insaan gehri neend mein chala jata hai aur gehri neend kharaton ka bohat bara sabab hai. Is liye aisi adwiyaat (Medicine) ka istemaal tark kar dena chahiye ke jin ke istemaal se insaan ko gehri neend aaye aur is ke bajaye aisi adwiyaat ka istemaal karna chahiye jin mein menthool paaya jata ho. Kyun ke sat podina (menthool) saans ke raastoon ko khol deta hai.

Bazaar mein aisay be-shumaar sapre mlitay hain, jo saans lainay ki salahiyat ko barha dete hain. Aisi adwiyaat ka istemaal kharaton se bachao ke liye sood-mand hai. Kharaton ka sad-e-baab is terha bhi mumkin hai ke sonay se kam az kam teen chaar ghantay pehlay alchohal ka istemaal na kya jaye aur na hi neend ki golian li jayen.

In dono ke istemaal se jism ke pathay riliks ho jatay hain aur mareez neend mein bohat ziyada kharatay lainay lagta hai.

8 Bistar, Kamray ki Safai

Agar aap din bhar theek rehtay hain magar raat ko naak se saans lainay mein masla paish aata hai to aisa mumkina tor par allergies ke baais hota hai, jis ki bunyadi waja aap ke bistar, Takyon ya ghilaaf ka ganda hona hai. Agar aisi situation ho to foran apne bistar ki chadar aur takyon ke covers waghera ko dhoo len ya tabdeel kar den.

Is ke ilawa apne kamray ki bhi achi terha se safai kar len. Aisa karne se bhi aap kharaton ke khatraat ko kam kar saktay hain.

9 Cigarette Noshi se chutkara

Jo log Tambaku Noshi karte hain. Inhen maloom nahi hota ke cigarette galay ki jhilion ko sojnay par majboor kar deti hai. Aik tehqeeq ke mutabiq tambaku noshi karne walay 30 fisad afraad bohat buland aawaz mein kharatay lainay ke aadi hotay hain.

Is liye agar aap kharaton se nijaat chahtay hain to aap cigarette noshi ki aadat chor kar is bemari se bhi bach satke hain.

Kharaton se nijaat ka mustaqil tarika

Agar aap kharaton se mustaqil nijaat bhi chahtay hain aur ilaj par paisay bhi kharch nahi karna chahtay to ye tarika aap ke liye hi hai. Raat sonay se pehlay bistar mein late kar apne haath ki paanchon unglion ko akatha karen.

Aur apna mun khol kar apni paanchon ungelian aik sath mun mein daal len. Is amal se aap ke jabray thak jayen ge lekin aap ne ye amal kam az kam teen minute tak jari rakhna hai. Isi douran aap ne dosray haath se halkay halkay andaaz mein apne naak aur galay ki maalish bhi karni hai.

Dosray marhalay mein aap ne apna mun khol kar apne haath ke angothay aur aik ungli se apne galoon ko andar ki taraf do se teen minute tak dabana hai. Aur isi douran naak ke zariye zor zor se saans lena hai.

Teesray marhalay mein mun band kar ke zabaan se nichale dantoon ko bahar ki tarf dhakelna chahiye. Ye amal bhi 2 se 3 minute tak karna hai.

Is terha is amal se aap ki Naak, Mun, Galay, Jabron, Danoton aur Zabaan ki werzish ho jati hai. Aur ye amal Saat se Das din tak karne se kharaton se hamesha hamesha ke liye nijaat mil jati hai.

Ye tajurbah 300 shadi shuda afraad par kya gaya. Tajarbay ke baad jab mutaliqa afraad ke shareek hayaat se nataij akhaz kiye gaye to maloom hawa ke aik 130 ke qareeb afraad ne bilkul kharatay maarny chor diye hain. jab ke 100 afraad ke kharaton mein numaya kami aayi hai. Jabkay baqi mandah ki haalat par koi khaas farq nahi para.

Kharaton par tehqeeq aur is ke nataij

Kharaton se azdowaji zindagi par kya asraat muratab hotay hain. Ye jhanchne ke liye ye tehqeeqi surway das hazaar (10000) shadi shuda afraad par kya gaya.

Jin mein se 1200 afraad kharaton ki bemari mein mubtala thay. Un baara so afraad par mazeed tehqeeq se bazail nataij akhaz kiye gaye.

  • 80 fisad mard jabkay bees fisad aurtain kharatay layte hain.
  • 30 fisad afraad ne apne shareek hayaat ke sath aik kamray mein rehne se inkaar karte hue allag kamron mein sona shuru kar diya tha.
  • 42 fisad afraad kharaton ko bardasht karne ke aadi ho chuke thay. Taham is ko unhon ne khush dili se qubool nahi kya hawa hai.
  • 11 fisad afraad ne kharaton ki wajah se apne shareek hayaat se hamesha hamesha ke liye alehadgi ikhtiyar kar li thi.
  • Baqi mandah ne bataya ke jab un ka shareek hayaat kharatay laita hai to wo usay jaga dete hain. Kyunkay kharaton ki mojoodgi mein neend nahi aa sakti.
  • Kharaton ki wajah se sath sonay walay afraad ki neend mein average 2 ghantay kami hui thi.

Is mazmoon se mutaliqa agar koi cheez aap ki samajh mein nahi aayi hai ya aap matazka baala tehreer ke hawala se mazeed maloomat haasil karna chahtay hain to aap hamein comments kar satke hain.

Aap ke har Sawal, har Comments ka Jawab diya jaye ga. Taham agar aap ko ye tehreer achi lagi hai to aap usay social media ( Facebook, Twitter, waghera ) par bhi share kar satke hain. Taakay aap ke Dost Ahbaab ki bhi behtar tor par rahnumaiye ho sakay.