Qabz ki alamat wajohat aur desi ilaj in urdu
Natural Treatment

Shadeed Qabz Ka fori desi ilaj in Urdu

Qabz aik aisi khatarnaak bemari hai. Jis ke baray mein aam tor par kisi ko batana bhi bais-e-sharmindagi samjha jata hai. Qabz ko umm-al-amraaz yani bimarion ki maa kaha jata hai. Qabz ko English mein Constipation aur arabi mein hasar kehte hain.

Aaj ke daur mein har paanchon fard is marz mein mubtala hai. Ye aik aisi bemari hai jis se insaan ko apni zindagi mushkil mehsoos honay lagti hai. Khaas tor par ramzan-al-mubarak ke douran ziyada log is bemari mein mubtala hotay hain.
Is bemari main ziyada tar log Doctoron aur Hakeemon ke pas jane se katrate hain, aur internet par kuch is tarah se search kar rahe hote hain, Qabz kya hai, qabz ki alamat aur wajohat in urdu, Qabz ka ilaj kaise mumkin hai, Shaded qabz ka fori desi ilaj in urdu, purani qabaz ka desi ilaj karne ke gharelu totke kon kon se hain, agar aap yehi kuch search kar rahe hain to ye tehreer aap he ke liye hai.

Qabz ki tareef:

Agar rafa-e-haajat mamool ke bajaye dosray, teesray ya chouthay din aaye, ya thori thori miqdaar mein menganon ki shakal mein aaye aur aisay mein sakht halaat ka saamana karna parta ho, to ye Qabz kehlata hai.

Hum rozana jo kuch khatay hain. Wo hamaray mun se hota hawa maiday aur choti aant mein pohanchana hai. Jahan par khoraak se haasil honay wali tawanai ke tamam ajzaa allag kar liye jatay hain aur khoraak ka jo phuk (fazla) bachta hai wo barri aant mein se hota hawa amaa mustaqeem mein jama ho jata hai phir aik munasib waqfa ke baad na qabil bardashat ho kar jisam se bahar nikal jata hai. Agar ye amal ruk jaye to qabz kehlata hai.

Qabz ki shikayat ziyada tar un logon ko hoti hai jinhein mehnat ki aadat na ho aur sara din baithy ya letey rehtay hon. Is liye qabz daur karne ke liye inhen werzish (chehal-qadmi) ki aadat dalni chahiye. Dorna, kashti chalana, ghurr daud, teraaki, kubadi, hockey, foot baal, wali baal, tennis aisi games hain jin ke khailnay se qabz nahi rehti.

Agar ziyada khanay ke baad aap ghunodghi mehsoos kar rahay ho to letnay ki bajaye chehal qadmi ki kosh karen, jis se hazem ka amal taiz ho jaye ga aur qabz ki shikayat se bach jayen ge.

Qabz ke sehat par asraat:

Baqaida rafa haajat na karne se tabiyat mein bhaari pan rehta hai aur bhook bhi kam lagti hai, kyunkay jab anton mein pehlay se jagah mojood na hoto nai ghiza ka daakhil hona mumkin nahi hota aur jab ghiza andar na jaye to tawanai mein kami waqay ho jati hai.

Agar ghiza ka ye fazla kharij na ho aur buri aant mein para rahay to be shumaar jaan lewa amraaz peda ho jatay hain. Jaisay dil ki ghabrahat, ghashi, dil ki taiz dharkan, buland fashar e khoon, nazla zukam, dard e sar, zeaf dimagh, ghunodghi, , thakawat, har waqt halka halka bukhaar rehna, aankh kaan aur naak ki bemariyan, appendix, gurdon aur jigar ki bemariyan, bawaseer, bhook ki kami, dard e shikam waram jigar, joron ka dard, yarqaan, khoon ki kami aur antadiyon aur pata mein pathriyan waghera. Isi wajah se kaha jata hai ke qabz umm al-amraaz hai.

Qabz ki wajohaat

  • Qabz ki wajohaat mein pehli wajah naaqis ghiza hai, naan, kulche, chuney, jo, baajray aur mayday ki roti. Saqeel, charbeeli aur der se hazem wali ghazain, wo ghazain jo khushk hon ya jin mein ratobat kam ho tab bhi qabz ka sabab banti hain.
  • Gurdon ke rastay jismani ratobaton ka zayed miqdaar mein kharij hona, qay ki zayad-ti waghera se bhi qabz ho jati hai in ke ilawa bawaseer, anton ki soozish aur motapa bhi qabz ka baais bantay hain.
  • Azlaat mein agar kamzoree hoto ye bhi qabz ka baais hai. Anton ke andar aik qisam ki qudrati harkat hoti hai, jab ye harkat sust hoti hai to qabz la-haq ho jati hai.
  • Baaz auqaat kuch pasandeeda khana milnay par zaroorat se ziyada kha lainay se bhi bad hazmi aur qabz jaisi shikayaat ho jati hain, bohat se afraad murgh muslim aur talli hui chit patti ashya khanay ko tarjeeh dete hain jo qabz ka sabab banti hain. Khana khanay ke baad musalsal baithy rehne se bhi qabz o bawaseer ki shikayaat paida ho jati hain.
  • Baaz afraad raat ka khana nahi khatay aur subah tak bhukay rehtay hain itna lambay waqt tak agar jism mein kuch na jaye to khoon mein mithaas ki miqdaar kam ho jati hai aur phir ghiza ko agay badhaane wala ansar na honay ki wajah se qabz ki bemari peda ho jati hai.
  • Derye masnoaat, gobhi, Lobia, band ghobi, saib, nashpati, ziyada namak walay khanay aur carbonated mashrobat waghera se na sirf pait mein gas bhar jati hai balkay ye qabz bhi karte hain.

Qabz se fori nijaat ke aasaan aur gharelo totkay

Qabz ke marz mein mubtala mareezon ko waqt par khana khanay ke sath sath sabzion ka istemaal ziyada se ziyada karna chahiye aur aur nihar mun kam azkam chaar glass pani piinaa chahiye. Aatta baghair chhana istemaal karna chahiye kyunkay aattay ka chhaan purani qabz aur diabeties ke mareezon ke liye behtareen dawa hai. Is mein raishay ke ilawa vitamin bay paaya jata hai jo azlaat ke liye maqwi hai aur jism mein taaqat ka baais bantaa hai.

Rafa haajat ke auqaat ka taayun

Qabz ka aik ahem ilaj haajat ke auqaat ka taayun bhi hai. Subah uth kar kuch khanay ke baad aik muqarara waqt par beeet al khala jana chahiye. Balkay agar haajat na ho tab bhi jayen is terha waqt par haajat honay ki aadat ban jati hai magar khaali pait na jayen zaroor kuch na kuch khakar jayen.

Raat ka khana zaroor khayen, raat ko khanay aur sonay ke darmiyan kam azkam teen ghantay ka waqfa honachahie aur is waqfay ke darmiyan paanch so qadam chalne se anton mein tawanai peda hoti hai jis ke nateejay mein aglay din rafa haajat mein koi pareshani nahi hoti.

Adrak ki chaye ya podeenay ka qehwa

Podina aur Adrak dono maiday se mutaliq mutadid shikayaat ke liye aazamaa_e hue gharelo nuskhay hain. Podeenay mein mojood menthol ghizai naali ke pathon ko relax karne mein madad deti hai jabkay adrak aik garam jari booti hai jo jism ke andar hararat barhati hai aur khana jald hazem hojata hai.

Sab se pehlay pani ublain aur is mein lemoo ka ras aur kati hui adrak daal len. Is mehlool ko din mein do se teen baar istemaal karen. Is bemari ke douran idraak bohat mufeed hoti hai adrak ko bareek pees kar gannay ke juice ya shehad kay sath bhi istemaal kar saktay hain.

Qabz se nijaat aur nizaam inhizam ko behtar bananay ke liye adrak ko kaat kar aahista aahista chabian. Adrak ki chaye ka istemaal aap ko qabz ki shikayat nahi honay deta. Aur podeenay ka qahwa aap ko is mozi bemari se nijaat dila deta hai.

Lemoo ka istemaal

Lemoo pani mein shaamil acid ghizai nizaam mein tehreek ka kaam karta hai aur jism mein mojood zahreeley mawaad ko bahar nikaalte mein madad deta hai. Har subah aik glass lemoo pani ya lemoo ko chaye mein shaamil kar kay istemaal karen jis se nizaam haazma mein behtari aaye gi.

Is ke ilawa aik lemoo ka ras aur aik chamach saib ka sirka neem garam pani mein daal kar pene se qabz daur honay lagti hai aur maida mazboot hota hai.

Sonf ka istemaal

Agar pait ki bimarion ke liye kisi qudrati cheez ka naam liya jaye to sonf is mein sab se ziyada mufeed hai. Is ke istemaal se anton ko sukoon miley ga aur pait se gas kharij hogi aur qabz se nijaat miley gi.

Aap chahain to aik chamach sonf ko aik glass pani mein daal kar ublain aur aadha pani reh jane par ye mashroob pi len, baqaida istemaal se aap wazeh farq dekhen ge.

Jo ke dlie ka istemaal

Pait ki bimarion mein jo ka daliya bhi bohat mufeed hai. Ye pait mein jaakar pholta hai aur anton mein boojh ki kefiyat peda kar kay ajabat ke amal ko taiz karta hai. Jo mein lahmiaat ke ajza paye jatay hain jo jism ko tawanai muhayya karte hain. Agar kisi ko kamzoree ki wajah se qabz mehsoos horahee ho to jo khanay se is se nijaat mil sakti hai.

Fiber wali ghzaon ka istemaal

Fiber kisi pipe cleaner ki terha kaam karte hue aap ki ghizai naali mein mojood ghiza aur fazlay ke ajza ki safai karta hai, beej, daalon, daliya, badamon, mutadid sabzion aur khushk mewa jaat mein fiber ki miqdaar kaafi hoti hai

Rozana 20 se 35 gram fiber ka istemaal qabz ki shikayat mein kami laane ke liye madadgaar saabit ho sakta hai, taham bohat ziyada fiber jism ka hissa bananay par pani ka istemaal bhi ziyada karna chahiye.

  • Aalo bukharay fiber se bharpoor phal hai aur ye wo juz hai jo anton ke af-aal ko behtar kar kay qabz ko khatam karne mein madad deta hai, aik aalo bukhary mein aik gram fiber hota hai jo ke jism ke liye munasib miqdaar hai, isi terha is mein mojood deegar ijza bhi nizaam hazem ke masail par qaboo panay ke liye mo-asar saabit hotay hain.
  • Maalta bhi fiber se bharpoor phal hai jabkay calories bhi bohat kam hoti hain, isi terha tursh phalon mein faunal nami juz bhi hota hai jo ke qabz kusha ka kaam karta hai.
  • Kishmish fiber se bharpoor honay ke sath sath is mein tartaric acid bhi shaamil hota hai jo halkay julaab jaisa assar dekhata hai. Aik tehqeeq ke mutabiq aadha oons kishmish rozana ka istemaal karne walay afraad ka nizaam haazma dugna taizi se kaam karta hai.
  • Chhere aur khobani bhi fiber se bharpoor hoti hain aur qabz ko zordar zarb lagati hain.
    Aaloocha fiber se bharpoor phal aisa gharelo ilaj hai jo nizaam haazma ko phir se track par lata hai. Teen aalochay teen gram fiber jism ka hissa banatay hain jabkay in mein aik juz aisa bhi paaya jata hai jo antariyon ko harkat mein lata hai.
  • Aalo ke chips ki bajaye agar aap saaday pop corn ko tarjeeh den to mun chalanay ki khwahish ke sath sath qabz se bhi bach saken ge, tibbi mahireen ke mutabiq ye jism ki fiber ki zaroriat poori karne ka aasaan zareya hai, kyunkay in ki kuch miqdaar mein teen gram fiber hoti hai.
  • Palaak na sirf fiber se bharpoor hoti hai balkay magnesium ke husool ka bhi behtareen zareya hai, ye minral anton ke liye zaroori hota hai aur fazlay ko saaf karne ka kaam karta hai.
  • Aik tehqeeq ke mutabiq jo log ziyada chawal khanay ke aadi hotay hain in mein qabz ka khatrah 41 fisad tak kam hota hai, is ki koi wazeh wajah to nahi batayi gayi magar mumkina tor par chawal mein mojood fiber is hawalay se madadgaar hota hai.

Tib-e-Nabwi (SAW)

Huzoor pak (SAW) ne qabz ke ilaj mein jo arshadat farmaiye hain science apni tamam tar koshisho ke bawajood bhi is ke barabar na aa saki. In ke ahem nakaat ka khulasa ye hai.

  • Khana waqat par khaya jaye. Raat ke khanay ke baad jaldi na soya jaye aur paidal chlajaye. Neez farmaya ke raat ka khana amanat hai, aur na khanay se kamzoree ho jaye gi.
  • Khanay se pehlay tarbooz ya kharboza pait ko saaf karta hai. Neez nashtay mein jo ka daliya anton ko saaf karta hai.
  • Aatta chhaan kar na pakayen. Kyunkay is ki bhoosi qabz aur dil ka ilaj hai.
  • Khushk injeer ke do teen danay har khanay ke baad khanay se na sirf qabz khatam hoti hai balkay ye bawaseer ka ilaj bhi hai.
  • Hazrat jabir ban abdullah razi Allah taala anho riwayat karte hain ke nabi kareem (SAW) ne farmaya. Raat ka khana hargiz tark na kya jaye, khuwa muthi bhar khajoor kha len kyunkay raat ka khana tark karne se burhapa (kamzori) taari hoti hai.

Is mazmoon se mutaliqa agar koi cheez aap ki samajh mein nahi aayi hai ya aap is tehreer ke hawala se mazeed maloomat haasil karna chahtay hain to aap hamein comments kar satke hain. Aap ke har sawal, har comments ka jawab diya jaye ga. Taham agar aap ko ye tehreer achi lagi hai to aap usay social media (Facebook, Twitter, etc. ) par bhi share kar satke hain. Taakay aap ke dost ahbaab ki bhi behtar tor par rahnumaiye ho sakay.

Zaroori Note : Qabz se mutaliqa ye tehreer mehez maloomat aama ke liye shaya ki ja rahi hai. yaad rakhen har totka har insan ke liye nahi hota. iss liye apne tain koi nuskha mat azmayen, balkay apne mualij (Doctor, Tabeeb) se mahswara kar ke is ki hadaayat ke mutabiq amal karen, shukriya.