shadi ke bad mota hone ke karan
Relationship

Shadi ke bad insan mota kyun ho jata hai

Shadi ke bad motapa kyun hota hai, shadi ke bad mota hone ke wajohat kya hain, Agar aap ke zehan main bhi yehi sawal gardash kar rahe hain to ye tehreer aap he ke liye hai.

Kya aap ne kabhi ghhor kya hai ke shadi ke baad aksar logon ka jismani wazan bherne lagta hai aur woh motapay ka shikaar ho jatay hain.

Agar haan to is mein heran honay ki koi bat nahi kyunkay kamyaab shadi ki sorat mein jismani wazan mein izafa ho sakta hai. Yeh daawa Central Queensland University ki aik tahaqeeq mein samnay aaya.

Australian tahaqeeq ke douran 15 hazaar se zayed joron (couples) ka jaiza liya gaya jin ke rishte ko 10 saal ho chukay they.

Tahaqeeq mein daryaft kya gaya ke joron (couple) mein jismani wazan bherne ka imkaan tanha afraad ke muqablay mein ziyada hota hai, chahay un ka tarz zindagi sahet mand aur ghiza sahet bakhash hi kyun na ho.

Mohqiqeen ne is ki aik dilchasp wajah bhi batayi hai aur woh yeh ke shadi ke baad logon ko apne shareek hayaat ko mazeed mutasir karne ki zaroorat mehsoos nahi hoti, lehaza un ka jism phailna shuru ho jata hai.

Tahaqeeq mein bataya gaya ke jab joron ko lagta hai ke ab inhen ziyada khobsorat nazar anay ki jarurt nahi, to woh ziyada khanay se guraiz nahi karte ya charbi aur cheeni se bharpoor ghiza ka ziyada istemaal karne lagtay hain aur jismani wazan control mein rakhnay ki koshish nahi karte.

Shadi ke bad motapa kyun hota hai

Isi tarah jin joron ke bachay hotay hain, un ke andar apne bachon ke bachay hue khanay ka rujhan bhi paaya jata hai.

Ye bhi parhain: Shadi karne ke fawide

Yeh pehli tahaqeeq hai jis mein bataya gaya ke shadi ke baad jismani wazan mein izafay ki wajah sirf ghair sehat mand tarz zindagi hi nahi hota.

Nataij se maloom howa ke joron mein jismani wazan bherne ki wajah har qisam ki ghiza ko be fikri se khana hota hai kyunkay inhen apne jismani saakht jawani ki tarah rakhnay mein koi khaas dilchaspi nahi hoti.

Mohqiqeen ka kehna tha ke joron mein bahair khanay peenay ki aadat bhi is ki wajah banti hai kyunkay shadi ke baad taqarib mein shirkat bhi ziyada honay lagti hai.

Ye bhi parhen: Choti Umer main shadi karne ke fayde

Waisay zurori nahi ke sab ke sath aisa ho magar mohqiqeen ka kehna tha ke beshtar afraad shadi ke baad motay honay lagtay hain, jis par control rakhnay ke liye apni ghiza ka khayaal aur jismani sar garmion mein izafay ki zaroorat hoti hai.

Is tahaqeeq ke nataij tibbi jareeday Plos One mein shaya hue. Is se qabal guzashta saal Scotland ki Glasgow University ki tahaqeeq mein bhi bataya gaya tha ke shadi ke baad new marriage couple ka jismani wazan bherne ka imkaan bohat ziyada hota hai.

Tahaqeeq mein bataya gaya ke shadi ke aik saal baad jorey ke jismani wazan mein ausatan 2 se 3 kilo gram wazan barh sakta hai jabkay jin logon par charbi ziyada jaldi barhti hai, woh 3 mah ke douran hi do kilogram izafi wazan ke maalik ban jatay hain.

Ye bhi parhen: Shadi shuda zindgi ki kamyabi ka raaz

Tahaqeeq ke mutabiq is ki asal wajah shadi ke baad khanay ki miqdaar mein izafah ho jana hai, jabkay no-biyahta jorey jismani tor par ziyada sargaram nahi rehtay ya werzish se daur honay lagtay hain, jis ki wajah se jismani wazan bherne lagta hai.

Tahaqeeq mein mazeed bataya gaya ke shadi ke baad logon ko apne jismani wazan par nazar rakhnay ki zaroorat hai, kyunkay motapay ka shikaar hona khud itmadi ko nuqsaan pohanchata hai jabkay shareek hayaat se talluq bhi mutasir ho sakta hai.

Agar aap ko ye tehreer achi lagi hai to aap ko haq banta hai ke is post ko apne dost ke sath social media par share kiya jaye.